中環出更：讚女性較大膽 傅大全曾遇男士洗牙驚到喊
「牙痛慘過大病」，但係有啲大人就寧願忍受牙痛都唔敢去睇牙，見到牙醫都怕怕。多名牙醫尋日出席香港牙醫學會嘅活動時，都講起唔少難忘嘅醫牙經驗，學會嘅基礎牙科護理工作小組主席傅大全話，睇牙方面，女性忍痛力比男性強，亦大膽好多，試過有男病人洗牙時驚到喊咗出嚟，要即刻起番身，安慰一輪之後先可以完成洗牙過程添！
傅大全話，好多時男性唔會主動去檢查牙齒，通常都係女朋友或老婆幫佢哋登記，逼佢哋先肯嚟睇牙醫，有啲仲要一路拖住另一半隻手，先夠膽張開囗o架。原來咁多男人咁細膽o架！
今次活動仲有牙醫林德昭、香港國際牙科博覽暨研討會創會主席梁世民，以及菲臘牙科醫院管理局主席王桂壎出席。林德昭就講起，細個剝牙通常都係父親包辦，爸爸會叫佢擘大口、郁吓啲牙，郁郁吓就自然甩咗出嚟。問起林係咪能醫不自醫，佢就話當然啦，補牙同剝牙一定要靠同行幫手，但自己勝在有專業知識，知道點樣及早預防，仲話家人牙齒護理全部都係佢包辦，就算個女箍牙都係由佢整。咁阿女有冇嗲住咁叫你唔好整痛佢，佢話咁又無喎，對阿女同病人都一視同仁咁話。
梁世民開音樂等病人放鬆
梁世民就講起，做牙醫有時要做埋心理醫生，因為有啲病人上到嚟心情緊張，自己通常會開音樂或收音機，等佢哋放鬆吓心情，之後先開始剝牙，咁就會好好多。仲話如果遇着小朋友睇症，唔係個個上到嚟，就即刻可以剝牙o架，有啲小朋友要等佢熟習吓環境，又要同佢玩吓，先可以幫佢哋診症。
卓妮