政情：今日你上鏡：生日會收好多禮物 劉桂容：囝囝開玩具店
好多人都話儲蓄同理財要由細個開始培養，但係荃灣區議員葛兆源同太太、元朗區議員劉桂容（阿容）嘅囝囝葛震灝，已經開玩具店嘞！嘩！咁犀利，六歲就做老闆？
阿容早前喺Facebook貼文，話囝囝玩具店開張大吉。其實係講緊囝囝開生日會，當日好多小朋友同家長參加，亦都收到好多禮物，阿容先開玩笑講吓啫！
一家三口都係七月之星
其實，佢哋一家三口都係七月之星，事關佢哋都係七月生日，阿容最先喺七月十四日，爸爸葛兆源就喺二十一號，而囝囝就係三十一號，所以呢個六歲嘅生日會係提早慶祝嘞！