政情：顏汶羽收藏太多模型 屋企無位擺 太太叫停
唔少大人細路都有儲玩具習慣，觀塘區議員顏汶羽亦都細細個開始儲微縮模型，特別係同香港情懷有關嘅微縮模型，淨係儲有香港特色嘅車仔都有百幾架，例如校車、郵車、雪糕車等，啲車仔仲多到連太太都成日叫佢唔好再買，屋企冇位擺咁話，所以佢近年都買少咗喇。佢又話，希望香港都可以整番個玩具館，等唔同年代、具代表性嘅玩具都可展現唔同年代嘅風格喎。
顏汶羽第一次買微縮模型車時仲係小學生。佢話有次見到架夾斗車仔，就同媽媽講︰「呢架第度冇得賣o架」，媽媽驚佢扭計，就買畀佢，自此佢就幾乎見一架買一架，最高峰時有成三百架車仔，多到可以佔半個客廳，雖然後來有啲送咗畀人，但都仲有成百幾二百架。
顏又話，早排同一間專門做微縮模型嘅公司負責人傾偈，呢間公司本身做開玩具生意，亦都好鍾意有香港情懷嘅嘢，所以就將香港嘅車同街景做成模型。佢就覺得將香港情懷變成商品呢個主意幾好，可以將情懷傳承，令年輕人都知有啲咩嘢係屬於港人嘅集體回憶。