政情：肥彭又回魂 指指點點刷存在感

修例風波 拋出屎橋

修例引起社會激烈衝突，林鄭早已「跪低」宣布暫緩修例，又話條例草案已「壽終正寢」，但風波至今並未平息。肥彭接受網媒訪問時就講過，假如佢係林鄭就會講得更清楚，話有關條例草案唔止「壽終正寢」，而係入土為安。然而反對派要求嘅係政府宣布撤回草案，唔用「撤回」字眼，反對派都未必收貨，肥彭講嘅分分鐘都係屎橋。

肥彭又話，佢會成立一個公開、透明嘅獨立調查委員會研究抗議示威背後嘅原因，警方如何處理示威活動等，又話獨立監察警方處理投訴委員會並非一個合適及有足夠分量嘅機構可作有關調查。佢仲念念不忘舊時，講自己曾被委派成立獨立委員會調查北愛爾蘭警方被指濫用武力問題，當時開咗近四十場公開會議，覺得香港都需要一個類似嘅過程。

其實肥彭對本港修例噏三噏四都唔係第一次。對於元朗近日因修例發生暴力衝擊事件，肥彭又再廢噏，話對於市民反對修例嘅激烈程度並唔感到意外，又形容修例係愚蠢做法，政府應該只針對台灣殺人案。佢仲話回歸二十二年一直冇修例，香港相安無事，而九七年之前同之後，中港兩地都冇引渡安排並非如林鄭所講係「漏洞」同「錯誤」，而係有意嘅安排，仲話修例可以話係「駱駝背上最後一根稻草，或者法國人講嘅打破花瓶嘅水滴」。真係唔知嘅仲以為佢喺度教英文諺語。

評論員嘲不甘寂寞

時事評論員陳雲生就批評肥彭唔應該對林鄭及香港內部事務說三道四、指指點點，質疑肥彭回歸後冇咩嘢做，又冇重要角色，所以就不甘寂寞、「刷存在感」。陳又質疑，肥彭作為末代港督，但當年一直未有處理有關修例問題，係要處理但又唔處理，所以喺政治道德上，肥彭係唔應該評論香港修例問題咁話。