中環出更：趙瑞萍可分身做會長 全賴丈夫做湊仔公
城市女青年商會日前舉行頒獎晚宴，表揚城中幾位傑出女性。會長趙瑞萍話因女性具有生育嘅天職，加上華人社會傳統嘅家庭觀念，好多具有才幹又懷有願景嘅女士一旦結婚做媽咪，為盡人妻同母職之下，就好難堅持初心同夢想。
經營清潔消毒用品生意嘅趙瑞萍育有一個兩歲嘅囝囝，能夠分身應付會長職務，佢話全賴先生肯幫手做「湊仔公」，先至有時間同機會主持會務，以及出席各大小場合及活動。佢又話女性處事手法較柔和，若能擺脫某啲束縛的話，事業上就可以發揮其獨特優勢。而佢先生雖然喺重視男性嘅潮州家庭長大，但因早年喺外國接受教育，其後又曾擔任晉峰青年商會嘅會長，明白領導一個組織嘅經驗係相當可貴，因此能夠以開明嘅態度去看待太太為事業奮鬥。
歐陽鳳盈創立義工隊
成功嘅事業女性背後有一個好伴侶，若果女士未有對象嘅話，又有邊個可以提供支持呢？今次獲獎嘅其中一位時尚專業女性歐陽鳳盈，儘管目前係單身，但就秉承佢爸爸「人人為我，我為人人」嘅理念，創立義工隊服務社區。此外，人生裏面嘅「伯樂」都好重要，歐陽鳳盈話國術總會會長王嘉恩，帶佢見識義務工作嘅世界，藉此累積活動統籌嘅經驗，對佢嘅事業有莫大幫助。
為今次選舉擔任評審嘅傑出青年協會主席趙傑文，認為女士較男士細心同注重細節，喺今日服務型經濟中可謂優勢盡顯，不但造就好多女強人，亦會同男性一齊扮演家庭經濟支柱嘅角色。而另一位得獎人譚麗時就話事業成功嘅女士，通常都予人硬朗嘅形象，只係身處嘅職場位置或工作崗位使然，其實女強人喺事業以外，都好想有一個男朋友或老公嘅膊頭可以依靠咁話。
卓妮