政情：今日你上鏡：大肚容海恩 玩轉動漫節
立法會議員容海恩（Eunice，右二）多次表露鍾意打機，即使依家已為人母呢個興趣都冇變，所以現時大住肚佗緊第二胎，仲走去尋日開幕嘅香港動漫電玩節暨電競音樂節，認真貪玩！佢大住個肚都入場同人逼，真係擔心佢玩得太忘我，唔記得肚入面嗰個。
不過佢老公袁彌昌似乎好放心，因為見袁喺相關嘅Facebook貼子中畀Like支持Eunice囉！
同年輕人切磋大熱遊戲
Eunice就話參觀咗唔少攤位了解現時電玩嘅最新發展，仲即場同年輕人切磋大熱遊戲，直言玩得不亦樂乎，睇嚟同後生一輩相處融洽無代溝喎，而打機之外，Eunice仲話童年回憶湧晒上心頭，事關會場有經典動畫人物模型專區，畀佢見到細個鍾意嘅卡通模型咁話。
（互聯網）