政情：分享九龍城趣事 梁思韻出兒童地方誌
全港十八區，區區有故事。從事教育工作嘅菁英會公關及傳訊委員會主席梁思韻，為咗下一代對自己身處嘅社區有更深入嘅認識，打算透過社企為香港每一個行政分區，都以繪本形式出版一本兒童地方誌，而打頭炮嘅就係九龍城區。
雖然以小朋友為對象嘅書籍唔可以寫得太艱深，但喺搜集資料嘅過程中，梁思韻同另外三位拍檔就發現唔少同九龍城相關嘅得意故事。譬如香港嘅飲食文化，九龍城可謂貢獻良多，因為舊時五湖四海嘅旅客，一踏出啟德機場就可以到就近嘅食肆醫肚，久而久之就將本國嘅食材或烹調手法傳授畀香港人，從而產生沙嗲牛肉麵、叉燒湯意粉或炒貴刁等等嘅Crossover飲食。
冀保留香港非物質文化遺產
不過，當機場搬咗去赤鱲角，呢種交流現象恐怕一去不返。梁思韻話好似清拆多時嘅九龍城寨，以前住喺城寨嘅居民進行以物易物嘅經濟交換，同埋又由於建築物胡亂僭建，導致門牌號碼混亂無序，只有喺樓宇天台跨來跳去嘅「飛天郵差」等，呢啲上一代親述經歷相當難得，所以梁思韻期望透過出版書籍，安排老街坊進行口述歷史，把握機會為香港保留可貴嘅非物質文化遺產喎。