針對打擊鼠患嘅「全城清潔大行動」一向被質疑只係一場做騷嘅活動，五月展開至今已經過咗成兩個月，但本港鼠患問題根本未停過。深水埗區議會尋日討論區內鼠患問題時就講起呢個行動，話政府呢個行動只係「限米煮限飯」，形容「注定失敗」，而區內鼠患問題亦都未見有起色。有區議員仲打算去信政府，表達對成效嘅不滿添。行動搞咗兩個月，只係換來區議員鬧爆，食物環境衞生署署長劉利群真係要好好檢討吓，如果再係咁「扮工」做騷，本港遲早老鼠圍城喇。
