政情：郭位：領導大學要「心件」
一間大學要辦學要成功有乜嘢因素呢？香港城市大學校長郭位就話，大學都擁有教科書等硬件同埋知識等軟件，但係「心件」都係領導大學不可或缺嘅一環。而郭口中所講嘅「心件」其實就係指一種文化、心態、行為習慣、思維模式及分析大學對社會所作貢獻嘅方法喇。
確保大學係社會重要部分
城大同泰晤士高等教育喺呢兩日合辦咗首屆「領導與管理峰會」，峰會係以廿一世紀嘅大學管理為主題。郭位喺峰會開幕致詞時就提到「心件」呢樣嘢，佢話發展「心件」係佢哋嘅使命，呢樣嘢能夠確保大學係社會嘅重要部分，而唔係裝飾品。
佢又希望，各大學領袖善用硬件同軟件，帶領創新和企業家精神，恪守自主同學術自由，推動教研合一。佢認為教育嘅目的應該係促進學者同學生學習，教學同研究均對學習過程帶來裨益咁話。