政情：智慧燈柱受質疑 資科辦怕死澄清
近來唔少網民都擔心政府新推出嘅智慧燈柱會有人臉識別功能，令市民私隱不受保障，仲有疑似有該功能嘅智慧燈柱圖片喺網上流傳。政府資訊科技總監辦公室（資科辦）尋日就發新聞稿，指有關圖片與智慧燈柱試驗計劃無關，重申智慧燈柱無人臉識別功能。目前社會氣氛緊張，唔通係掌管資科辦嘅政府資訊科技總監林偉喬怕死，所以要急急澄清？
重申冇人臉識別功能
資科辦尋日發出新聞稿，話留意到網上流傳一張擷取自新聞片段嘅圖片，令人誤以為該圖片顯示嘅技術係智慧燈柱嘅功能。而事實上有關圖片顯示嘅係今年四月一個資訊科技博覽嘅一個展館中展示嘅入場人數計算技術。資科辦重申智慧燈柱根本唔會應用此技術，亦冇人臉識別功能。
其實智慧燈柱近來已停用部分功能，例如燈柱原本裝有高清全景攝錄機及藍牙交通探測器，當局聲稱係為咗打擊非法傾倒以及提供實時交通數據，不過因外界擔心會變成監控工具，所以當局已停止推出呢啲功能喇。呢啲科技咁敏感，政府如未做好諮詢就強推，分分鐘引火自焚。