政情：梁肇輝推介本地水果 乏人問津

喺開會之前，梁肇輝已經話特登帶咗今年「本地有機西瓜節」推介嘅其中兩種特色品種畀委員試吓，希望推廣吓本地農產品，旁聽人士同記者都有份試食。有委員食完之後大讚「好甜」，但開完會啲西瓜仲剩番一大半，睇嚟委員都唔係幾捧場。梁肇輝就話唔會浪費，食剩嘅西瓜會攞返辦公室請同事食。

「影子署長」話開會有啲悶

其實佢仲帶咗兩個「影子署長」去開會，中四同學仔高泳霖同張鈞珽都聽得好專心，坐到直一直，仲間唔中同梁肇輝咬耳仔，睇嚟都有啲緊張。開完會之後，兩個同學仔就笑笑口話個會咁長，「都有少少悶」。睇嚟署長下次都係帶同學仔去種西瓜好啲啦！