政情：任葆琳拍短片 為區議會流會道歉

區議會主席朱慶虹喺當日嘅會議上話等多十五分鐘，但夠鐘仍未夠法定人數開會而宣布流會，由於當時大部分建制派區議員都唔在席，被質疑係避開討論反修例，而喺流會後先到場嘅任葆琳亦有即場向傳媒解釋遲到原因。

強調係無黨派獨立議員

近日佢拍咗段短片上載Fb，話因應街坊建議澄清吓近日發生嘅事。佢喺短片中為流會道歉，話當日早上喺議員辦事處與同事工作，突然有一名市民喺冇預約嘅情況下上門求助，因而連中午嘅議員飯敍都冇出席，而喺趕返會議室途中，亦先後傳短訊畀民政事務專員同主席，但最終都係趕唔切。

佢強調係無黨派嘅獨立議員，重申反對倉卒同未釋除市民憂慮情況下修例，指區內嘅連儂牆曾發生縱火事件，而佢嘅橫額亦遭破壞，直言呢啲刑事行為唔能夠接受，又話喺呢段期間不斷被人評頭品足，由頭髮評到落腳趾尾，承受好大壓力，幸有好多街坊給予支持而感到好開心。