政情：鄧偉江退休 陳萃如接掌統計處
政府音樂椅又再轉動。政府尋日宣布統計處副處長陳萃如將喺本月二十六日出任政府統計處處長，接替將退休前休假嘅鄧偉江。
羅智光祝鄧退休愉快
公務員事務局局長羅智光話，陳萃如喺統計工作方面擁有豐富嘅專業知識同經驗，具備優秀嘅領導同管理才能，深信佢定能帶領政府統計處面對未來的挑戰。對於即將退休嘅鄧偉江，羅指鄧表現專業，一直對工作熱誠投入，積極提升部門嘅效率以及服務水平，祝願佢退休生活充實同愉快。
喺鄧偉江任內，最令人關注嘅事就係人口普查，曾被爆統計員集體拖鐘、集體蛇王，喺一六年全港中期人口統計，統計員會上門要求住戶用平板電腦填寫電子問卷，為避免平板電腦無電，統計處向統計員派發俗稱「尿袋」嘅外置充電器。點知有尿袋發生爆炸，統計處要急急回收五千個尿袋，鄧被鬧爆畀啲統計員帶住「流動炸彈」四圍走，威脅市民生命安全。