政情：八網難逃：楊偉誠返母校打氣 讚學弟妹醒過當年嘅自己
每個人對母校都有一份好深嘅情感，香港演藝學院校董會副主席楊偉誠都唔例外，尤其佢嘅母校就嚟要搬添！
楊偉誠日前喺Facebook貼文同上載咗幾張相，佢話係喺龍崗道樂善堂小學畢業，日前應邀返母校接受一班應屆畢業同五年級小學生嘅訪問，仲話有為佢哋打打氣。點解要打氣呢？事關呢間小學將會結束，日後改建成臨時住所，啲學生將會去到另一個新環境繼續學業，佢話最開心係聽到班學生非常積極面對轉變，仲讚佢哋雖然年紀細，但思想成熟，比佢當年醒目好多喎。
重訪小六班房嘆唔捨得
咁啱當日拍攝訪問嘅課室，就係佢讀小六時嘅班房，所以佢嘅感受更大。母校即將結束，佢仲話好唔捨得添！