中環出更：旅行紀念瑰寶 朱仲賢：收晒喺個腦
旅行唔單止開心仲可以減壓，唔少人都會收藏當地嘅特產同飾物，但係香港廣西社團總會常務理事朱仲賢（Billy）就話最有紀念性嘅嘢都收藏喺個腦裏面。點解呢？
卓妮日前喺保良局嘅活動中遇到Billy，當時佢帶埋太太同兩個仔一齊嚟撐場。佢話自己平均一個月至少飛兩次，所以去過好多唔同嘅地方，見到有紀念性飾物都會買，最深刻有一次去維也納旅行時，見到有個瓷器公仔好靚、好喜歡，買咗之後擺喺屋企做裝飾品，佢再補充話，其實最有紀念性嘅嘢都收藏喺個腦裏面，一家人開心時光係永遠唔會忘記。
馬清楠夫婦 最鍾意見小朋友笑
轉頭見到保良局主席馬清楠同太太，佢話香港同外地都會搜羅唔同當地特色裝飾品，通常去旅行買得最多，最深刻係去非洲旅行嘅時候買木雕藝術品，一來自己比較鍾意，而且見到小朋友燦爛嘅笑容自己都特別開心！
鄭明明絲巾做手信 準備送朋友
有「美容教母」之稱嘅鄭明明對絲巾有濃厚興趣，所以佢去親旅行一定會抽時間去睇吓當地產品，會特意挑選多種顏色同鮮艷啲嘅絲巾。點解？佢話方便襯衫同埋睇落去精神啲，仲話早排去旅行買咗啲絲巾未用過，諗住送畀啲志同道合嘅朋友，等大家都可以開心吓。
香港女童軍總會副會長陳曦齡就話最愛收藏古董同名畫，所以一有時間就同老公去上環古董街行吓，最近就買咗一個胭脂盒係宋朝時代古董，手工十分精緻，仲話最開心係兩公婆都有共同嗜好。去睇古董時又可以順便拍吓拖，聽到都好Sweet！
卓妮