政情：八網難逃：賀一男子榮休 袁彌昌姊弟妹合體
有唔少父母都會將幾個仔女送入同一間學校，令小朋友可以互相照應，亦方便接送。日前新民黨前政策總裁袁彌昌（Derek）罕有地同家姐，以及妹妹、人民力量前主席袁彌明合體，出席活動賀一名男子榮休。到底邊個咁有分量？
原來係三人嘅小學老師
Derek介紹呢位甘Sir係佢哋姊弟妹嘅小學老師，但教乜就唔太記得嘞，話好似係數學同體育，笑言以前嘅老師乜都教，但肯定甘Sir係袁彌明嘅班主任喎，自己畢業後留喺舊生會先見甘Sir多啲，覺得教咗四十五年退休，真係唔捨得。
咁以前有無百厭被罰？佢堅定話無，因為大家讀寄宿學校，有社監睇住，邊個夠膽曳吖！佢又話同家姐相差五年，掹車邊可以同學校生活，當時自己一年級，家姐六年級，咁啲風紀又係六年級，大家都會照顧佢呢個小弟弟。咁咪即係有特權？Derek笑話，家姐就係咁用o架嘛，不知幾方便添！