政情：南區區會流會 建制以病假事假解畫
南區區議會上周召開大會卻因法定人數不足而流會，當時大部分建制派議員齊齊缺席，事後遭民主派批評逃避討論撤回修訂《逃犯條例》修例動議。多位建制派區議員趁尋日開社區事務及旅遊發展委員會會議，否認逃避開大會，解釋嘅理由更五花八門，連病假事假都出齊。睇嚟佢哋係想補鑊啫！
有人話收緊急來電處理要事
南區區議會副主席陳富明、林玉珍、歐立成、張錫容、麥謝巧玲、朱立威、林啟暉同陳家珮，齊聲否認上周刻意缺席大會。代表發言嘅林玉珍話，當日上述區議員缺席原因包括生病告假、公務在身、午膳時接到緊急來電而離場處理急事等等。林多番強調建制派冇必要為咗避談撤回修例動議而「製造」流會，同時指當日缺席嘅建制派區議員亦對流會一事感到非常遺憾。
林又指得悉近日社會有聲音指，當日缺席嘅建制派區議員是「故意、集體製造流會」，佢形容上述說法並非事實，「有人話我哋唔想討論某一議題而流會，但係我哋覺得冇必要或需要而唔講呢啲問題！」
上周四南區區議會大會原定討論由民主派區議員提出撤回修訂《逃犯條例》議程、葛量洪醫院同瑪麗醫院重建計劃等多項議程。惟當日到咗大會開會時間，僅有主席朱慶虹同五名民主派議員在席。當主席宣布等十五分鐘後仍冇足夠法定人數，最終宣布流會。