政情：陳正欣同飛機有心靈感應

兩次奇遇 心想事成

陳正欣經常要出外公幹，大多數都係坐飛機，仲話同飛機好似有心靈感應咁。佢話有兩次特別經歷，有次工作要北京飛上海，因為自己記錯約好晒司機喺虹橋機場等，但原來係飛浦東降落，上到機發現後，心諗如果飛虹橋就好喇！冇耐機師突然通知大家，因浦東機場降落跑道有問題轉飛虹橋機場，佢聽到後成個精神晒。

另一次係喺美國飛返香港，以前飛機要喺阿拉斯加加油後再飛，但依家已經可以直航返港，佢話喺美國回港途中，心諗好耐冇去過阿拉斯加機場，如果喺嗰度短暫停留就好嘞，點知突然聽到廣播因燃油唔夠要短暫停留阿拉斯加，佢聽到後開心到不得了，落機後喺機場禁區內緬懷一番。果然心想事成喎。