中環出更：蔡毅明着長衫打乒乓球拎全場總冠軍
做運動梗係着啲輕便嘅衫喇！但着長衫打乒乓球賽，大家有冇試過呢？時裝設計師蔡毅明早前就同幾位長衫薈嘅骨幹成員，一齊着長衫打咗場乒乓球友誼賽，以證明現代化嘅長衫動靜皆宜，既入得Ball場，亦可以出得運動場。
話說某日蔡毅明見到國貨公司裏面放置一張乒乓波枱，於是佢就聯想到乒乓球係中國最普及嘅體育運動，而長衫就係華人婦女最具代表性嘅服裝，若果穿上長衫呢種國服去打乒乓球呢種國技，應該係會幾得意，於是佢就相約埋幾位長衫薈嘅成員切磋球技。
蔡毅明仲話，為求動作靈活，鬆身嘅衣着似乎較貼身嘅長衫更為有利，但今次着去打乒乓球嘅長衫，就係選用彈性布料，再配合假襟同唔對稱裙腳等特別剪裁，施展扭、抽、轉、跳等乒乓球動作都游刃有餘。雖然佢懷有身孕，但仍可連接教練三十六球成為全場總冠軍。
彭芷君承傳媽媽乒乓球細胞
喜歡打乒乓球嘅長衫薈成員有好多，彭芷君就係其中之一。彭芷君嘅媽咪過去係乒乓球健兒，兼且曾獲五屆全港最佳女運動員嘅榮譽，身為囡囡嘅彭芷君或多或少都承傳到媽咪嘅乒乓球細胞，小學時代已代表學校出戰。佢又話明年奧運會乒乓球運動員嘅服裝倘能夠融入長衫元素，就會彰顯中國作為乒乓球强國嘅形象。至於設計同構思，就要考吓時裝設計師嘅腦筋啦！
借出場地進行今次乒乓球賽嘅國貨公司負責人余偉傑，雖然學生時代喺男校度過，但佢覺得以長衫作為女生校服，睇起來特別端莊同優雅。由於男校學生通常唔換校服就打波，於是余偉傑就猜想，到底女學生穿上長衫校服打乒乓球又會係乜嘢景況呢？今次長衫薈嘅乒乓球友誼賽，總算令佢一開眼界之餘，又反映長衫本來就係華人婦女嘅日常衣着，唔係只局限喺宴會場合。
卓妮