政情：冇舉手都叫發言 林琳誤會黃偉傑眼神
說話幾時都係講清講楚好啲，有時單靠一個動作，或者一個眼神嚟表達，真係好易引起誤會o架嘛！好似荃灣區議會沿海事務委員會尋日開會，委員會主席林琳就一度誤會議員嘅眼神，當時講到港鐵荃灣西站旁嘅單車徑事宜，原本應該係輪到議員譚凱邦發言，點知林琳就叫咗另一議員黃偉傑，搞到黃偉傑就打咗個突，話自己根本冇舉手，林琳隨即發現自己誤會咗，仲講咗句：「我以為你嘅眼神代表一切。」引起哄堂大笑。
鄒秉恬發言被「叮」
其實林琳一時搞錯可能都有啲原因嘅，事關上一位發言嘅議員鄒秉恬講到好勞氣，鬧爆土木工程拓展署唔肯將單車徑同行人路放埋一齊，點知鬧到一半畀人「叮」，原來鄒以為係無限時發言，但其實每人只得三分鐘，講笑咁講咗句「乜個委員會咁渣o架！」唔知林係咪畀鄒嚇一嚇，先搞到之後叫錯黃偉傑呢？及後到林琳自己發言時仲補番句「主席都係得三分鐘咋。」唔通佢係咪有意安撫鄒先至特登提呢句？