政情：半世紀師生情 盧偉國重遇馬紹良
立法會工程界議員盧偉國（WK）曾經講過，鳳溪公立學校行政總裁馬紹良係佢老師，而早幾日WK出席母校賽馬會官立中學搞嘅舊生音樂會，兩人又再重遇，WK仲感慨時光飛逝，話兩人嘅師生情誼至今剛好五十年。半世紀嘅師生情，真係唔容易，相信會繼續延續落去。
WK日前喺社交網站上貼文，重提馬紹良喺一九六九年大學畢業就到校任教，佢當年讀中五，係馬Sir嘅第一批學生，嗰時母校個名係「賽馬會官立工業中學」，而今次喺音樂會重遇，當然要飲番杯、影番張相留念。
出動鑽石色士風夾band
既然係音樂會，WK亦同幾隊來自唔同年代嘅舊生夾band，亦有喺師弟妹嘅管樂隊同軍樂隊表演，而演出者有六十年代畢業至近年畢業嘅校友，年齡相差半世紀o架！但音樂真係可以打破隔膜，大家都好興奮，而佢亦出動咗鑽石色士風夾 band 吹奏《新不了情》添。