政情：元朗區會 嘆工程撥款唔夠叫價獅子開大口

元朗區議會轄下有委員會尋日召開會議，當中交代地區小型工程計劃嘅進度，現時有五個項目已獲委員會通過並正在施工，已批出但仍等緊開工嘅項目有四個，當中只得一個項目施工有期，另外有成二十個項目排緊隊等跟進，真係唔知幾時先有做到嘅一日喇。

質疑元朗得唔到重視

會上多名議員都大呻有排等，不但關心自己所提嘅項目，直頭講到成個元朗都受影響。姚國威形容工程價格升得快過豬肉，如果項目拖太耐，造價分分鐘會再上升，擔心屆時造價太高昂會拖死項目。姚國威早喺一五年提出喺天水圍嘅部分行人路加建上蓋，但因撥款唔夠同人手不足，搞到排緊隊，大嘆政府派發四千蚊搞到天怒人怨，但行政費用就高達三億元，倒不如為小型工程計劃增加撥款，將錢用落利民紓困工程啦。

另一區議員黎偉雄就話，自己分別喺一四年同一五年提出金錢圍村同水流田村項目，至今暫未見任何進展，直言等得太耐，認為現時政府唔係無錢，元朗區地方大，區議員數目超過四十人，一年二千萬元並唔足夠，質疑元朗區得唔到重視。

批似掟舊豬骨畀狗搶

最後，委員會主席李月民話，元朗地區大，既有鄉郊，亦有新發展區，好多工程急住做，決定以委員會名義去信政府表達不滿。佢批評，現時二千多萬元撥款太少，政府好似「掟舊豬骨畀狗搶」，搞到議員之間互相爭奪，建議加至每年一億元，又邀請政府官員落區聽民怨同意見。李強調，一億元只能夠追落後，撥款加幅遠遠追唔到工程造價嘅飆升，就算有一億元，元朗區每個選區平均分得不足三百萬元，認為呢個要求並唔過分。

講真嗰句，工程造價上升，要求調整撥款都唔出奇，但要求加幾倍，相信都好難令人接受囉，唔通真係好似街市講價咁，獅子開大口再等政府還價？