中環出更：聆訊未知改幾時 譴責許智峯恐延遲
民主黨立法會議員許智峯（峯鴿）去年四月因為喺立法會大樓內強搶保安局女行政主任（EO）手機而惹上官非，最終被判罪成，不過就唔使坐監，但其實峯鴿仲未完全甩難，事關仲有個立法會譴責佢嘅委員會，委員會原定係喺今個暑假前完成聆訊，不過立法會早前受到破壞，無法再開會，結果原本安排好嘅會議都被迫取消，聽講依家未定到下次聆訊係幾時，變相委員會嘅有關報告隨時會延遲！
料暑期前難完成
委員會早前已經開咗至少五次會議同一次聆訊，仲預期暑假前可以完成聆訊，點知立法會大樓意外地受到破壞，原本七月上旬已安排嘅會議都被迫取消，據知有委員認為要暑期前完成聆訊並非完全唔可能，不過大樓依家未必開到會，咁短時間內搵到合適場地並唔容易，暗示暑期前完成聆訊嘅機會偏低，但仍預計下個立法年度完成所有工作應冇問題。
查實峯鴿搶完手機後被控嘅三項控罪，包括不誠實取用電腦、普通襲擊、阻礙公職人員執行公務全部罪成，不過就只有判社會服務令同罰款，有幸暫時保得住個議席，所以立法會譴責佢嘅委員會會否通過都係關鍵，因為可能令峯鴿議席不保，不過依家聆訊連帶報告難免要延遲，會唔會再出現變數就未知喇！
卓妮