中環出更：鄭慕智孖太太行超市返屋企煮飯仔
夏天成日都落大雨，好多時都會影響行程，甚至唔想出街整濕身o架，不過原來唔少政商界名人，都唔會因為天氣差就唔出街食飯。卓妮早前喺一個商場遇到香港保險業監管局主席鄭慕智，孖住太太一齊喺超市買餸，鄭慕智講起，落大雨都會照出去食晏，因為中環好多商場都連埋一齊，淋唔到雨，裏面有好多食肆，所以冇有怕咁話喎！
鄭慕智當日同太太喺超市內，各一部手推車，仲大手入貨添，買咗雞蛋、蔬菜、肉類等等，沿途挑選貨品時，都有商有量，約半小時後就買完嘢離開，大袋嘅戰利品先交畀司機攞上車，鄭自己就拎袋細。鄭慕智話，諗住返屋企煮飯仔，平時收工冇應酬，通常都會買完餸後，就返屋企煮飯。呢排天氣雖然好熱，但有時都會突然落大雨，鄭話，就算落大雨都會外出食晏，去商場食肆就唔怕淋濕身啦，仲會喺公司放定把遮，咁就完全唔擔心落雨出唔到去食嘢嘞！
孫秉樞仲同朋友飲下午茶
卓妮尋日喺中環又先後撞到香港長者產業聯會會長蔡少偉（William）及有「鐘錶大王」之稱嘅孫秉樞，二人同樣唔會被天雨影響外出食飯嘅意欲。孫秉樞講起，食飯好緊要，唔會畀任何嘢，包括天氣影響到，佢啱啱食完晏，依家出嚟同朋友飲下午茶完，覺得好開心，最緊要落雨嘅時候唔好畀雨淋到，否則好易感冒，仲話有好嘅身體，去邊都唔怕喇！
轉個頭撞到William一個人行街，同佢傾開偈，佢都話，天氣唔好都會照出嚟食飯o架，因為出嚟行個圈再返公司，先有精神再做嘢咁話。其實撞到William時，佢就係啱啱食完晏，入咗一間運動舖睇波鞋，約五分鐘後離開，原來佢有做開運動，所以經常留意有乜新款嘅波鞋，食完晏就順便行吓睇吓囉！
卓妮