政情：梁美芬被圍勁狼狽 搵支持者護航返立會
建制派議員梁美芬前日喺立法會外開記者會後，被民陣成員狙擊同的士司機拒載，情況都幾狼狽。梁美芬尋日就一身輕裝，帶同約十名支持者「護航」，帶同一班身穿連身裙、手持名牌袋嘅太太一同到立法會。佢話好多支持者見佢前日被包圍，所以特意嚟保護佢，所以佢都做導遊帶大家巡視「災區」。
有兩位太太向傳媒講感受時，情緒激動，大罵教育局要為事件負責，有乜理由畀啲人着黑衫去煽動人。喺附近游走嘅泛民支持者就反問：「黑衫得罪你啊？」雙方開始愈嘈愈粗俗，愈走愈近似想打交，警方即刻上前分開人群。而梁就匿喺人群背後，仲話「搵幾個保護我哋」，喺警員保護下開始導賞團。其實風頭火勢，大家避一避，冷靜吓咪仲好，相嗌唔好口嘛！
理大學生代表「下戰書」齊考通識科
另外，佢日前批評喺反對修訂《逃犯條例》事件上，問題出於中學通識科冇教好學生品德，又鬧教育局冇檢討課程，理大學生校董、學生代表聯席召集人李傲然尋日向佢「下戰書」，一齊挑戰通識科公開考試，以考試成果向港人展示雙方對通識科嘅理解。