政情：釜山硬食催淚彈 詹勝自嘲因貌似韓農
近期社會騷亂不斷，催淚彈、胡椒噴霧等都紛紛出動，仲引起唔少爭議。香港華菁會副主席詹勝尋日就好有自信咁話感受過催淚彈，唔通有份走到前線參加近日嘅衝擊？
其實詹勝並唔係講緊近期嘅事，而係十幾年前喺韓國釜山嘅事迹，當時佢的確走到前線，但絕對唔係示威者。佢笑住話韓國警方可能以為佢係韓國農民，而佢當時就中過幾次催淚彈，可能仍然年輕而無乜大損傷，只係鼻涕同眼淚會不停流，失去反抗能力啫，事後飲杯水同食番支煙就無事喎。
紓緩不適有心得
詹勝解釋，自己當時連胡椒噴霧都中過，係班韓國農民教落，要拎支煙對住對眼吹去紓緩不適，似乎班韓農對呢啲武器好有心得喎。