中環出更：點只通識科做錯 董建華縱容假難民遺禍
前特首董建華近日選擇性地與部分傳媒高層閉門會面，據報道指佢話通識教育係年輕人問題嘅重要原因，形容通識教育失敗。教協尋日嘅記者會就批評，董嘅說法係諉過於人，言論令社會更撕裂，亦係對前線教師極大指控同侮辱；有學者更指董建華亦為假難民種下禍根。
教協理事兼通識教師方景樂強調，政治問題應該用政治解決，唔應該喺無證據下指控教師散播政治信念，「仲嫌個社會唔夠撕裂？」又指董誤解教師唔專業地喺課堂上講解自己政見，「如果董建華同其他持相同意見議員有疑問，我好願意邀請佢嚟做我學生，跟我上一堂通識堂」。立法會教育界議員葉建源批評董嘅講法係為港府施政失敗搵代罪羔羊，認為近日事件源於管治及施政失敗，促請當局唔好諉過於通識科。
任內冇審視禁止酷刑公約問題
近日有人提出通識令學生變得激進，教育局首席助理秘書長區蘊詩尋日回應時稱，未見有實質證據支持此睇法，深信學校管理層同教師，喺課堂上引導學生討論時會秉持專業操守。
唔單止通識科做錯，理工大學專業及持續教育學院講師陳偉強認為，董任內種下唔少禍根，如果佢識喺通識科認錯，點解又唔諗吓回歸時冇審視香港實施《禁止酷刑公約》造成假難民問題，佢依家應該補鑊向中央反映，建議香港退出公約。
卓妮