中環出更：助展勝利人生 梁劉柔芬培養學生創業精神
喺「書中自有黃金屋」嘅社會觀念下，年輕學子要有光明前路，就必定要埋頭苦讀。不過青年企業家發展局（青企局）創會主席梁劉柔芬就覺得惟有讀書高嘅想法，可能不足以應付未來社會嘅挑戰，反而靈活奮進嘅創業精神，亦都係通向人生勝利組嘅另一條道路。
青企局賽馬會商校家長點創計劃尋日舉行結業禮，與會者包括梁劉柔芬及青企局董事袁翠珊，卓妮在場亦見到一口田慈善教育基金主席許芷茵。梁劉柔芬話課堂教育關乎基礎知識，儘管好重要，但佢就覺得追唔上時代，因此佢打算趁學生仲未離開校園，就培養佢哋嘅創業概念，提早掌握社會狀況。佢話美國有唔少科技企業創辦人，過去學業成績雖然唔見得理想，但亦無礙事業嘅發展，可見一個人將來嘅成就，同讀書成績嘅關係唔係咁大。
黃焯林讚新一代吸收能力強
香港美容業總會執行委員黃焯林就係應點創計劃之邀，到學校擔任公司大使。佢話同學生交流過程中，感到新一代嘅吸收能力好強，但就唔夠經驗去分析問題。佢認為喺學術上，欠經驗嘅好處就係唔受舊有觀念嘅束縛，創意可以無窮無盡，不過一旦「落地」，就可能打破舊有思維模式，倘若社會未能接受嘅話，年輕人可能會採取衝擊或選擇放棄呢兩種極端嘅做法。佢認為成年人都明白分析問題可以透過唔同嘅角度，作為前輩者，宜向晚輩分享自己嘅經驗之餘，亦要開放胸懷欣賞年輕人嘅創意同活力，唔好懷有視對方係廢青嘅成見。
為活動擔任評審嘅香港青年創業家總商會會員楊潤，就話年輕人嘅觀察力好厲害，好多成年人所忽略嘅社會「痛點」，年輕人都有所注視並想出解決方案，如構思提醒長者按時服藥智能藥盒，或設計指示視障人士避開障礙嘅帽，盡顯新一代嘅眼界同心思。
卓妮