政情：開會無期 陸頌雄恐難約市民講波
足球係唔少人熱愛嘅運動，但喺香港踢波就一啲都唔容易，所以立法會民政事務委員會原定喺本月九日舉辦公聽會傾呢個議題，其中議員陸頌雄仲拍埋片宣傳，叫市民一齊公聽會「講波」，點知撞正立法會受到破壞，仲可唔可以開會聽意見實在好難講喇！
陸頌雄喺立法會平台拍咗條短片，內容就係約市民去公聽會「講波」，例如場地、香港代表隊成績、青訓成效同港超聯入座率等。佢仲貼文指出，拍呢段片時立法會仲未受到破壞，亦可能諗住短片喺呢幾日出街，點知依家立法會受到破壞，開會無期，搞到短片好似Out咗，事關都唔知仲有冇得「講波」？
寄語立會「早日康復」
可能諗住既然拍咗短片，都唔好嘥喇！陸頌雄就呼籲市民留意公聽會嘅最新安排，或者喺本月五日先遞交書面意見咁話。至於立法會，佢就寄語「早日康復」嘞！