政情：莫宜端帶仔女返學 野生捕獲發哥
國際影星周潤發（發哥）係行山發燒友，唔少鍾意行山嘅市民都有遇過發哥，搞到網絡上都曾掀起「野生捕獲發哥」嘅熱潮，而今次就輪到勞工及福利局局長前政治助理莫宜端（Zandra），佢喺上月底成功「野生捕獲發哥」，不過就唔係行緊山，而係朝早帶一對仔女返學時，見到發哥跑過，就即刻叫住發哥影張相嘞！
Zandra日前喺Facebook貼文同上載咗張相，話當時只係見到發哥飄過後，都嚟唔切思考，已經衝口而出問發哥可唔可以合照，仲跑咗過去截住發哥添，好在發哥夠親民冇拒絕。點知影完之後，Zandra囝囝先至問佢係邊個嚟，Zandra唔知係咪興奮過頭，反問囝囝覺唔覺得發哥好靚仔，結果囝囝就用連串笑聲回應，Zandra心諗囝囝可能覺得佢癲咗。
網友葡萄：幾時到我
網民睇到張相都相當「葡萄」，紛紛都話「除了羨慕還是羨慕」、「幾時到我」，不過都有網民問Zandra有冇同一對仔女講發哥演過令狐沖，或者畀啲發哥演過嘅電影佢哋睇，咁佢哋就可以認識發哥喇！