政情：洩麥美娟爆粗知衰 梁定邦變拉鏈嘴

話說政府早前暫緩修訂逃犯條例後，先傳出工聯會嘅議員麥美娟爆粗大罵特首林鄭月娥「X街」宣洩對政府褪軚嘅不滿，後嚟又有疑似係金融服務界議員張華峰向監警會主席梁定邦，講述麥粗口大鬧禮賓府一幕嘅聲帶流出，據悉聲帶流出皆因上次監警會會議上，雙方都唔記得熄咪。

記者會後無傾偈即走

監警會尋日下晝四點鐘開記者會，宣布會主動調查連日嚟大眾對警方喺示威活動行為嘅投訴，梁定邦聯同另外五名監警會成員會見傳媒，第一句唔係交代記者會內容，反而尷尷尬尬咁話自己「學到嘢」，唔會再喺記者會前開咪講嘢咁話喎。

梁定邦咁講，好明顯係同洩露麥美娟爆粗事件有關，費事再搞出個大頭佛喇！而喺記者會完結後，「學到嘢」嘅佢果然即刻企起身走人，一句閒偈都無同人傾過。唔知將「禮賓府」多次講錯做「迎賓館」同「貴賓館」嘅張華峰又學到嘢未呢？