政情：新聞處疑做手腳 提問紀錄被消失
傳媒工作一直發揮第四權監察政府施政，惟近年採訪時卻面對限制，甚至連負責整體統籌安排傳媒採訪嘅政府新聞處都未有積極配合，過去政府已經開腔批評過。而新聞處尋日又成為新聞主角，事關發布特首林鄭月娥會見傳媒發言同答問內容時竟然將部分傳媒提問刪減，政府新聞處處長朱曼鈴今次又搞邊科？
修訂《逃犯條例》搞到滿城風雨，示威者更喺回歸日攻陷立法會並大肆破壞，搞到潛水多時嘅林鄭月娥尋日竟然係喺大部分市民仍然熟睡中嘅凌晨四點，帶同多名官員會見記者齊聲譴責暴力。難得有機會追問久未露面嘅林鄭，傳媒都非常進取多番追問。
問林鄭係咪覺得天堂仲有位
有傳媒就問林鄭月娥覺得對佔領立法會發生有冇責任，而青年視死如歸係咪因為政府無回應到訴求，亦有記者重提林鄭月娥前年接受訪問時，指相信上天已為佢喺天堂留位嘅言論，詢問佢係咪覺得喺天堂仲有位置、怕唔怕會落地獄等，但係新聞處發出嘅答問內容，呢類問題一概消失得無影無蹤。到底係新聞處做多咗，為求護主作自我審查，定係林鄭月娥心胸狹窄而要求做手腳呢？
特首辦強調內容非逐字記錄
特首辦接受查詢時話，因為當時傳媒眾多而出現多名記者同時發問情況，而且唔少記者喺林鄭月娥仲未回覆提問就立即提出其他問題，所以林鄭月娥先難以全部作答喎。特首辦又強調，答問內容並非逐字記錄，主要係要記錄林鄭月娥回答嘅問題同答案，而特首辦新聞組準備答問時，提問內容係咪敏感並非考慮因素，而傳媒同市民仍可以喺短片回看整個會見傳媒過程喎，真係信不信由你喇！
新聞處近年爭議又點止呢單，話說上年香港基本法委員會主任沈春耀履新後首次訪港，新聞處就上載咗錯誤相片，據報要約十分鐘先發現同作出更正，特首辦事後更要認衰承認手民之誤畀錯相，而喺今年初連政府都主動開腔彈有關傳媒採訪安排欠妥，似乎上任未夠一年半嘅朱曼鈴應付唔到新聞處嘅工作，先搞到錯漏百出喎。