中環出更：衝擊立會惹關注 彭定康又指指點點
香港回歸已經二十二周年，但末代港督彭定康（肥彭）多年來都陰魂不散，對香港事務說三道四，單係近期有關修訂《逃犯條例》風波已經多次指指點點，而前日發生衝擊立法會嘅大事，佢當然不甘寂寞又要出聲喇！
港督上身妄想指揮大局
肥彭尋日發聲明，指暴力示威係正中對方下懷，仲會削弱和平示威嘅影響力，重申自己一直反對暴力，認為尋日衝擊立法會大樓一事，同之前年輕人嘅示威特質唔一樣，而港府亦需要將今次衝擊，連埋之前多場示威同警方執法手段，一併進行調查咁話喎。
唔單止說三道四，佢又再次港督上身，好似想指揮大局一樣，大談港府應聆聽同回應和平示威者嘅聲音，又話好不幸港府之前無回應和平示威者訴求，更不幸係中央將矛頭指向外國勢力，認定示威者遭到操縱喎。佢仲講到現時係坐低對話嘅時機，重申和平示威無作用並非暴力借口，而任何自由社會當中，和平示威都係提出訴求嘅最佳方法喎。
雖然示威者多次批評港府未有回應訴求，但實際上政府就今次修例已經多次「跪低」，包括提出暫緩同道歉，並非肥彭所言無回應過囉！
卓妮