中環出更：破龍舟禁忌男女出擊 曾鳳珠首戰創佳績
扒龍舟係一項有悠久歷史嘅水上活動，雖然今日嘅龍舟健兒不分男女，但舊時嘅傳統，女性接觸龍舟就係禁忌。日前菁英會首位女主席曾鳳珠，頭一日上任就喺南丫島舉行嘅龍舟競賽中，同隊友合力奪得男女子公開組菁英銀盃冠軍，真係好兆頭。
曾鳳珠話今次凱旋而歸，係菁英會龍舟隊成立以來第一個獎盃，意義實在非凡。佢話舊年都有隨菁英會參加龍舟比賽，但成績就麻麻地，於是佢同一眾隊友，每逢周末都到香港仔海面練習，期望下次嘅賽事能夠有好成績。如果遇上天氣不佳，就改為室內健身鍛煉以維持肌肉記憶，務求各人嘅划槳動作都趨於一致。佢又話十幾個人同坐一條船嘅龍舟活動，大家為咗共同目標全力以赴，係最能體現團隊精神嘅體育運動。
菁英會龍舟隊揚威，副主席兼隊長鄭重科功不可沒。鄭重科話今次賽事雖然係十二人操作嘅小龍舟，但如何將隊員嘅實力充分發揮，就要講求戰術嘅運用。佢話頭兩場初賽，係安排經驗較淺嘅新隊員出場，決賽就由主力隊友上陣，結果領先對手接近一條龍舟嘅距離衝過終點。佢話教練喺龍舟尾負責操舵，眼見各隊員嘅划槳動作高度合拍，可見收穫嘅背後，有賴大家嘅不懈努力。
陳玉桂任鼓手
菁英會理事陳玉桂就喺其中一場初賽中擔任鼓手嘅角色。佢話龍舟鼓手毋須划槳，的確唔似得其他隊員咁費氣力，但鼓手會影響整隊人嘅划槳節奏，因此責任重大。至於練習扒龍舟經常重複划槳動作，會唔會擔心練成「麒麟臂」呢？佢就話唔會，因為扒龍舟除咗臂力，仲講求腰腿嘅配合，所以勤加參與龍舟操練，只會消失「拜拜肉」。不過扒龍舟始終都係戶外活動，好難避免陽光嘅照射，女士要保持美白，就惟有搽足太陽油，盡量做好防曬工夫。
卓妮