政情：撐完利物浦着曼聯波衫 顏汶羽被批牆頭草
足球係風靡全球嘅體育項目，球迷對支持球隊嘅狂熱實在不容小覷，導致球迷之間經常都會互相批評，好似利物浦同曼聯嘅球迷，彼此之間可謂勢成水火。觀塘區議員顏汶羽（Frankie）就被網民發現，佢六月初着住利物浦波衫去撐利物浦，月底又着曼聯波衫出海釣墨魚，被網民質疑佢「兩頭蛇」、「風吹邊邊就擺邊邊」！
話無意捲入球迷罵戰
Frankie接受查詢時就解釋，其實佢好多波衫都着過，唔單止利物浦同曼聯，仲有AC米蘭、祖雲達斯等，甚至香港隊波衫都有，所以佢並唔係某一隊嘅「死忠」，冇特定支持一隊，覺得好波就會支持。佢仲話其實自己都鍾意收集波衫，所以咁多年嚟已收收埋埋好多件，仲經常都會着出街添！
事實上，着唔同波衫確實好易得罪球迷，但Frankie就話暫時未試過因為咁而被人罵，相信好多球迷同佢一樣，只係想睇好波，至於球迷之間嘅激烈罵戰，佢就講明無意捲入去裏面咁話。