法庭：梁栢賢臨別「揪波」挑戰攞命陳

醫院管理局行政總裁梁栢賢（PY）今個月底退休，人哋就話臨別秋波啫，而佢就臨別「揪波」喎。

點解咁講？PY日前喺Facebook上載咗張相，仲貼文話「當陳總與（遇）到梁總，邊個會贏？論身形、技術和經驗，陳總得勝已成定局！」佢遇到嘅陳總係邊個？咪就係金融管理局總裁陳德霖囉！陳德霖亦已講明喺今年十月會退休嘞！而佢哋亦唔係偶遇，而係一齊打壁球。結果係點？睇佢貼文隱約都知道係輸波。

見PY自嘲，有網友就安慰佢「你都好型仔呀」；亦有網友話「一種運動，兩總切磋」，另有網友仲讚話：「各有千秋」。但有個網友就反問PY：「陳總花名你有冇聽過？」PY連打幾個問號，可見佢真係唔知，於是個網友話佢知陳總嘅花名係「攞命陳surely he wins（肯定佢贏）」。

陳德霖嘅洋名叫Norman，加埋姓氏就係Norman Chan，花名取其諧音就係「攞命陳」嘞！PY知道呢個花名之後，係咪更加輸得心服口服呢？