中環出更：卸任3個月 劉燕卿變「孫仔專員」
前申訴專員劉燕卿（Connie）啱啱退休卸任專員三個月，尋日喺一個酒會內見到佢依舊神采飛揚，原來近期化身「孫仔專員」，湊住孫仔周圍去。難怪心情咁好喇！
Connie透露，剛剛同女兒一家去咗澳洲悉尼同阿德萊德玩半個月，大讚當地天氣好、環境靚，覺得好舒服，玩得好開心。佢亦笑指成個行程都以孫仔為重點，單係睇樹熊都去咗三個唔同動物園，仲有餵袋鼠添，而最好彩喺酒店附近有英國名廚Jamie Oliver嘅餐廳，環境好兼唔使排隊，孫仔最愛嗰度嘅黑松露意粉，所以連續食咗幾次，諗番起都興奮喎。
做跟得婆婆 陪孫仔開學
咁今年會唔會再飛？佢就話唔使返工後悠閒咗，遲啲孫仔喺北京讀書開學就會飛去當地。睇相就發現，女兒同孫仔都同Connie有幾分似樣，相信呢位「跟得婆婆」實唔會同佢哋兩個走失啦！
仲記得Connie喺卸任申訴專員之前話過因為年紀大，所以決定花多啲時間陪屋企人，尤其係忙咗咁多年，實在太少陪屋企人，多少有啲歉疚，所以退休後會花多啲時間陪個孫咁話，依家佢就得償所願喇！
卓妮