中環出更：人生總遇困難湯修齊籲要搵親友傾訴
人生不如意事十常八九，你選擇逃避或面對困難？日前喺善德基金會嘅活動上，卓妮見到家庭與學校合作事宜委員會主席湯修齊，佢話人生唔開心嘅時間一定有，但一定要向前看，又以自己為例，讀書時成績突然唔係咁好，又正值中英談判，社會上有好多爭拗，當時都係唔如意時候，仲勉勵年輕人同自己一樣搵多啲信得過嘅朋友家人同老師傾訴，聽多啲唔同嘅意見，對自己都有幫助。
善德基金會主席董吳玲玲話自己天生樂天，就算遇到挫折都會堅持落去，會同自己講好快會過去明天會更好，仲希望所有人培養出包容同體諒嘅性格，向身邊嘅朋友發放正能量，咁大家都有正能量又點會唔開心呢。
朱景玄：唔如意要諗多啲
轉頭見到新界校長會會長朱景玄、仁濟醫院王華湘中學校長邱少雄同善德基金會總理鄒圳麗（Amy）。朱景玄話人生少不免都會遇到工作、生活同家庭唔如意嘅時候，佢有兩個辦法可以紓緩，第一個係祈禱，因為佢係基督徒，祈禱可從中紓緩到自己嘅心靈，第二個就係諗多啲，例如當身體唔舒服時會諗吓其實自己已經好幸福，喺世界上仲有好多人嘅遭遇比自己更差，咁就會放鬆好多嘞！
邱校長就話讀小六時爸媽移民外國，佢同家姐繼續留港讀書，可謂係相依為命，遇到困難時會同家姐一齊去解決，所以同家姐感情特別好，仲話遇到唔開心同困難時千祈唔好收埋，一定要攞出嚟解決，咁就自然會想得通。
Amy話喺創業路上經常被人呃同欺負，就算今次知道嗰個人呃你，下次都要勇敢去面對佢，喺邊度跌低就要喺嗰度起番身，咁喺人生中就會學到堅強去面對一切嘅困難。
卓妮