外傭政策問題多 家居炸彈不勝防

早排有套港產片講述一個癱瘓漢同佢個外傭嘅故事,佢哋由互相猜忌到相濡以沫,最終僱主仲幫外傭實現做攝影師嘅夢想,喊濕觀眾幾包紙巾,可惜理想很豐滿,現實很骨感,香港地外傭政策問題多多,百孔千瘡,僱主大吉利是請着個唔生性嘅返嚟,吸毒有之,賣淫有之,畀人搞大個肚亦有之,同引爆家居炸彈冇乜分別,真係唔慌唔一殼眼淚。

勞工及福利局局長羅致光尋日喺網誌又試叻唔切,吹噓勞工處過去一年多為外傭提供多種語言嘅電話專線,以及設立網上表格、電郵帳戶,方便外傭查詢。喂,羅局長IQ一百幾,月薪幾十餅,就係做呢啲手板眼見工夫,呢啲唔係「高薪養廢」,點先係?

係人都知,家陣僱主聘請外傭,係好係醜,基本上各安天命,全憑彩數,中介公司廣告口號「安心聘用,融入家中」,改為「憂心聘用,連累家中」就差唔多。網上唔少僱主組織呻到樹葉落,話聘請外傭有四大陷阱,一曰借錢、二曰虐兒、三曰大肚、四曰長期病患。特別係借錢問題,羅局長自己都識得講,外傭來港前好多都爭落人一屁股債,最終要喺香港借貴利。諗都諗到喇,大耳窿斷估唔會買機票去外傭鄉下淋紅油潑屎,最終無辜受害嘅咪又係僱主。面對呢個老大難問題,政府依家先如夢初醒急急補鑊,商討同外傭來源國銀行合作,為外傭提供低息貸款,仲有冇後知後覺啲呀?

嗱,都唔好講到賣淫吸毒借大耳窿咁極端嘞,外傭工作態度再差,僱主好多時都焗住揸頸就命,否則預咗飲「加尿靚湯」都得。冇計喇,政府靠得住,豬乸會上樹,本來當局操外傭中介公司生殺大權,只要對無良業者處以釘牌極刑,問題已經解決一大半,但現實係官老爺面對市民不滿嘅聲浪,闊佬懶理,關人個關,結果就係僱主請外傭步步為營,如履薄冰,事關第時有咩爭拗鬧上法庭,費時失事之餘,分分鐘仲要倒貼機票。有人形容不良外傭就好似瘟神咁,易請難送,可謂一針見血。

問心吖,港府對外傭算係不薄,定時定候加人工,幅度高過唔少打工仔;而講到改善福利,外傭唔使幾百萬人上街,只要祖家開句聲,港府跪都跪唔切。年前菲律賓當局投訴傭工抹窗危險,勞工處即時喺僱傭合約加入相關條款,工人出事,僱主分分鐘監都有得坐。反觀新加坡政府,規定僱主裝窗花嘅同時,強制外傭接受安全培訓課程,一碗水端平,大家條氣都順啲。

特衰政府就係咁嘅嘞,無論對外傭抑或假難民,都仲好過對自己人,「寧贈友邦,不予家奴」,是可忍孰不可忍!