政情：公屋戶疏離 陳詠燊歸咎手機
依家唔少市民住喺公屋，名導演陳詠燊尋日出席一個公屋短片創作比賽嘅頒獎儀式，憶述以前住公屋嘅難忘歲月。
街坊活動拉近大家距離
陳詠燊喺讀幼稚園時同外公住喺牛頭角下邨，佢話嗰時公屋嘅管理冇今日咁嚴格，走廊不時會有小販叫賣，而外公就會買豆腐花，淋上豉油然後撈飯食，而呢種滋味，早喺牛下邨清拆前已消失無蹤。佢住公屋嘅時日雖然唔長，但比較公屋嘅今昔變化都頗大，佢話舊式嘅公屋通常閂閘唔閂門，左鄰右舍可以互通聲氣，關係比較密切，雖然依家公屋嘅居住環境大有改善，但係每個單位門同門嘅距離大咗，住戶各自關門閂閘，鄰舍關係疏離。
點解會變得疏離？佢認為同物質條件有關，以往係一群人圍住一部電視機就會好滿足，依家就係一個人對住部手機就最開心。面對面嘅溝通顯得唔太重要，鄰舍關係自然愈拉愈遠，要拉近大家嘅距離，最好就係社區組織舉辦多啲街坊活動嘞！