中環出更：林超英料熱浪頻現 警告政府做定準備
喺踏入廿四節氣中嘅「立夏」後，夏天正式來臨，氣溫異常咁熱，多次打破最高溫紀錄。被網民形容「神預測」嘅天文台前台長林超英，日前再喺社交網站發貼，預計香港會愈來愈多熱浪出現，警告政府同民間團體要早作準備，以幫助基層「安全」度過炎夏喎！
呼籲各界幫助基層應對
林超英喺貼文話隨住氣候變化，熱浪出現機會愈來愈頻密，○三年歐洲熱浪就死咗七萬人，單係法國都一萬人，而早幾日法國試過錄得最高攝氏四十五點九度，破咗歷史紀錄，所以法國今次如臨大敵，做足防禦措施處理。而佢相信香港都會面對同樣情況，呼籲各界要做好準備，幫助基層應對。
其實林超英早喺○八年出任天文台台長時就預測，香港最快二○二○年冇冬天，兼且唔會再錄得低過攝氏十二度嘅天氣，近兩年冬天完全唔凍，網民認為呢個預言已經應驗。而佢以往亦不時關注劏房戶，擔心劏房生活環境會因為天氣愈熱愈趨嚴峻，遲早有日會「熱死」。睇嚟佢發貼係專程向政府發警告，希望今次政府能夠醒覺，唔係將來應驗預言，就喊到無謂嘞！
卓妮