中環出更：識行左握禮 劉彥樑爆梁卓偉做過童軍
「行家一出手，便知有沒有」。香港童軍總會喺日前舉行「為社區作貢獻」計劃開展禮，各個年齡層嘅童軍都聚首一堂。總會助理總監劉彥樑話做過童軍嘅人對童軍禮儀有深刻記憶，譬如食衞局前副局長、現任港大醫學院院長梁卓偉某次出席童軍活動時，伸出左手同童軍握手，佢一睇就知梁卓偉以前都係童軍，因為「左握禮」係童軍特有嘅禮儀。
點解用左手呢？背後有段古o架！劉彥樑話童軍之父貝登堡先生曾入伍從軍並派駐非洲服役，期間佢目睹當地嘅部落戰士，雙手分別持武器同盾牌，而當大家都想向對方示好，就會丟下盾牌伸出左手，而童軍就借鑑土著呢種做法，以示自己毫無防衞，真誠信任對方，又例如童軍領袖所佩戴嘅木珠，原本係南非蘇魯族人酋長嘅個人榮耀，有優秀戰士嘅意思，而童軍組織就用嚟代表領袖資格。
其實童軍嘅發展係與時俱進嘅，正如一啲技能章如「露營章」，部分內容亦有所修訂，因隨住露營用品改良同演進，過往野外紮營嘅技巧，今日未必適用，又例如數年前增設嘅「空勤員」章，畀資深童軍學習喺考章過程中了解飛行知識同透過模擬器材掌握駕駛飛機嘅技巧，而成功考獲空勤員章又通過總會嘅選拔，就有機會參與航空公司嘅見習機師計劃，從而進身職業機師。
吳亞明：未來深入社區服務基層
童軍總會香港總監吳亞明話過往童軍好多時喺公眾活動中負責維持秩序，角色較被動，而近年已積極投入各種社區服務，例如舊年童軍就參與颱風襲港後嘅清理工作，而未來幾年更會深入社區，服務基層同傷健人士。地中海貧血兒童基金會副主席李慧芬就話童軍到社區服務嘅計劃，正好解決佢哋義工不足嘅問題，而機構下個月嘅賣旗籌款，亦有賴童軍派員幫手。
卓妮