政情：游冬泳前打羽毛球 湯恩佳熱身方式與別不同
做運動前熱身，可以減輕受傷嘅機會。孔教學院院長湯恩佳向來都藉游水來鍛煉體魄，原來佢嘅熱身方式都相當與別不同，佢話，為咗堅持寒風之下都去游冬泳，佢會先打羽毛球來熱身，久而久之就對羽毛球運動產生莫大嘅興趣，仲打咗羽毛球四十幾年，但自從有暖水池之後，就毋須再用呢種方式熱身，近幾年支球拍都可以掛起喇。
設立比賽 推廣羽毛球
佢話，即使依家打羽毛球嘅次數係減少咗，都會出錢出力推廣羽毛球運動，其實佢喺一九七○年已經擔任亞洲羽毛球總會會長，近年仲設立「湯恩佳盃」以推廣羽毛球，呢個盃賽今年首次喺香港舉行，三個月前圓滿結束嘞，至於下屆喺邊個地方做主場，佢就話未決定。
講起游水，佢又話，自己雖然一把年紀，但毫無筋骨症患嘅困擾，就算太太患上傷風，佢都唔怕受到傳染，全賴六十多年來恒常游水喎。睇嚟真係日日運動身體好呀！