政情：二人相識多時 潘兆平廖成利仲好老友
政界中人好多時立場未必一樣，但都可以係好朋友。好似勞聯嘅立法會勞工界議員潘兆平同民協前主席廖成利早前喺同一個活動上出現，原來二人係相識多年嘅好朋友。潘兆平話，認識廖成利嗰陣，廖都仲未做律師，當年對方不時都會組織同參與社會運動，相當熱心，二人正正就喺呢啲活動相識o架嘞！
二人當日一齊出席香港勞工研究協會嘅就職活動，廖成利係呢個協會嘅法律顧問，而潘兆平就係嘉賓。勞聯被視為建制派一分子，同香港勞工研究協會部分立場未必咁相似，點解潘仲會去做嘉賓呢？
潘：勞工權益可一齊努力
潘就話，識咗唔少協會中人廿幾年咁耐，大家有啲事有唔同睇法都好正常，但勞工權益可以一齊努力，即使睇法有唔同，都會當佢哋係朋友，所以每年如果抽到時間，都會出席協會嘅活動做嘉賓o架。喺依家咁對立嘅政治氣氛下，真係好少聽到呢啲和而不同嘅想法！