打機真係大人細路嘅共同嗜好，港鐵行政總裁金澤培（前，圓圖）同物業總監鄧智輝（後）尋日出席青衣一個商場嘅電競活動時，一齊打機，打到聚精會神，相當肉緊咁。大家平日搭港鐵就唔衝得閘，不過金澤培尋日打機一開始已經衝閘，打到相當投入，其實金澤培之前已經自爆過鍾意打機，今次可能因為有人陪住佢一齊打機，加上個螢光幕又大，所以佢都打得特別開心，可惜佢同鄧智輝冇贏到今次活動。睇番今次有三個商場一齊連線，共十二隊人一齊打，咁多高手競爭，要贏都的確唔容易嘅。
