立法會議員不時外訪考察，睇吓外地嘅情況，等香港都可以取吓經。近年班議員不時都會去吓歐洲外訪，機票同旅費加埋，閒閒哋都要過萬蚊。衞生事務委員會轄下有個小組委員將會去台灣訪問，使費唔使一萬蚊，只係需要近九千八百蚊，聽落真係平好多。立法會議員每人有五萬五千蚊外訪津貼，唔知係咪因為會期就嚟完，所以要慳住使呢？
衞生事務委員會轄下嘅支援癌症病患者事宜小組委員會將會喺今年九月底去台灣進行外訪，內容係關於研究台灣癌症防控嘅經驗。成個外訪團會去四日三夜，將會同台灣衞生福利部、國民健康署、癌症防治政策委員會，以及相關非政府機構及團體會面，亦會參觀當地嘅癌症醫院同其他相關醫療設施。
睇戲就成日都會話，有重病要去歐美接受治療，點解班議員今次唔去歐美，而係去台灣呢？原來台灣衞生福利部喺二○○五年，就開始推行名為國家癌症防治計劃嘅工作，包括推動預防、診斷同治療癌症等，難怪啲議員都想去台灣取吓經啦！