政情：劉怡翔署任財爺 要搵邱騰華「頂更」
財政司司長陳茂波（波叔）最近去咗日本外訪，期間由局長署任職位都唔係啲咩新鮮事，但原來今次外訪幾日，就先後有財經事務及庫務局局長劉怡翔、商務及經濟發展局局長邱騰華署任職務，輪住做署任財爺，但點解要中途轉人呢？
因私務要放假
波叔今次外訪係去大阪出席「二十國集團（G20）峰會」，由星期四（27日）凌晨出發，今晚就會返抵本港，只係離港短短三日，但係署任財爺嘅工作就要中途轉人。頭兩日由劉怡翔署任，最後一日就由邱騰華署任。
按照過往慣例，如果波叔外訪或休假，署任財爺次序依次係劉怡翔、邱騰華同創新及科技局局長楊偉雄，突然中途轉人，即係劉怡翔有事嘞。聽講劉怡翔今日本身有私人事務要放假，署任唔到財爺職務，所以要邱騰華做署任財爺頂住先。聽落都係合適安排嚟嘅，否則有咩突發事情，甩晒轆就唔好啦。