政情：單仲偕為慳錢 淡季去馬爾代夫
香港人口老化，退休人士愈來愈多。然而銀行戶口要有幾多錢，退休生活先至冇閉翳呢？已告別職場生涯嘅立法會前議員單仲偕（𠜎雞）講起退休生活可以豐儉由人時，就教路去旅行都可以慳住咁去o架，例如佢即將去高消費嘅旅遊勝地馬爾代夫，就係等當地嘅旅遊淡季，機票同住宿都有特價嘅時候，先至去歎吓世界。
「有錢環遊世界 無錢行吓新界」
𠜎雞冇做議員後，不時都去吓旅行，佢形容「有錢就環遊世界，無錢就行吓新界」，只要知慳識儉，就算銀両有限都可以有一個唔錯嘅退休生活。佢認為要退休無憂，首先係子女都要具有謀生能力，其次就係完成物業嘅供款，當一個人無咗固定收入，但又唔想生活水平大打折扣，就要想辦法節省支出，例如淡季才去旅行。
佢又話，最令退休人士失預算嘅就係醫療費用，所以佢經常游水同行山，恒常運動以保持良好嘅體魄，否則病痛纏身，退休多多銀両都會唔夠用。聽落又幾有道理咁喎！