中環出更：游蕙禎告別青年新政 去向未明
因宣誓風波而被褫奪議席嘅前立法會議員游蕙禎，從政以來都以青年新政牌頭示人，不過尋日起就有個大轉變，事關佢就喺社交網站上宣布退出青年新政喇。睇番佢近來都已經較少組織示威請願等活動，依家仲退出青年新政，唔通想轉路線唔玩政治？
游蕙禎尋日發文同上載四年多前青年新政成立時嘅記者會相片，提到加入至今四年幾，身邊戰友都係佢走落去嘅力量，但自己亦有無可言喻嘅歉疚，因為到現時都畀唔到咩佢哋，過咗四年或到要重新變陣嘅時間。
青政：街頭上再會
佢又話，人同人嘅關係不時有改變，有時係戰友、同道，有時亦係依靠，關係唔應該因組織去概括，所以離開後仍然係心中有位置嘅朋友，佢今次同青年新政講再見，但佢同呢班戰友就必會再見咁話。
游蕙禎公布消息後，唔少網友都留言同關注最新路向，好似有人關心佢係咪正式淡出，以後政治係咪唔關佢事，亦有人問到係咪另起爐灶喎。青年新政亦喺社交網站回應話，感謝游過往對組織嘅付出，街頭上再會。
卓妮