中環出更：吳永嘉授長者健康之道瞓覺前後拉筋伸展
健康係一個永遠課題，一個人如果冇健康就乜都做唔到！立法會議員吳永嘉（Jimmy）早前出席黃大仙區健康安全城市換屆就職典禮時，講起長者點樣維持健康，佢就教路話，每日瞓覺前後都可以拉吓筋，做吓伸展運動，加強自己嘅平衡力，咁就冇咁易跌親喇！睇Jimmy個樣咁後生，真係同長者兩個字唔太扯得上關係，原來佢本身有關注老人事務，覺得政府都應該關注多啲，提供更多資源咁話。
講番今次嘅活動，主席史立德一向都好關注長者健康，佢話，香港人口老化愈嚟愈嚴重，有必要關注多啲，而自己喺黃大仙區服務咗十幾年，形容黃大仙區係「老人區」，所以過去一直有向區內長者提供服務，例如搞啲推廣健康飲食、家居安全嘅活動。
佢又講起，近年愈嚟愈多年輕人猝死，有啲年輕藝人、運動員都中過招，當中有部分就係因為附近有自動體外心臟去顫器（AED）先至救得番，所以嚟緊有意爭取喺地區入面增設更多AED，如餐廳、商場、運動場等，令到有需要嘅人可以把握「黃金幾分鐘」，增加番存活率咁話。
講到注重健康，當然仲有唔少嘉賓撐場，包括前保安局局長黎棟國、前立法會議員陳鑑林（橄欖）、懲教署署長胡英明、香港中華廠商聯合會常務會董陳淑玲等。黃大仙屬於九龍東嘅一部分，橄欖做過咁多年九龍東議員，就算依家退下火線，都仲係咁上心出席有關黃大仙嘅活動，認真念舊！
陳鑑林仲好熱心社區工作
橄欖就話自己雖然喺政圈退咗落嚟，但並未完全退休o架，仲講起近年已先後出現過蚊患、鼠患等唔同嘅社區問題，要不斷向居民宣傳唔同嘅防患意識，睇嚟佢仲係好熱心於社區工作。睇佢仲係咁有心有力，梗係要問吓啲健康貼士，佢就話始終都係要注重飲食咁話。
卓妮